Marcos PTT Carballido é un creador escénico galego nado en Lugo en 1977, cunha traxectoria de máis de 25 anos no ámbito das artes vivas.
A súa carreira abrangue múltiples facetas, sendo as de actor, director teatral e deseñador de son as principais.
O eixo principal que vertebra a súa carreira é a experimentación e o interese por formatos non convencionais, nos que o público deixa de ser un simple espectador para se converter nun axente creador.
A súa escola de arte dramática foi a Sala Nasa, a compañía Chévere e as Festas do Circo do Colectivo Pistacatro, xa que a tribo do circo foi, e segue a ser, a súa familia escollida. No ano 2004 mudouse a Barcelona e fundou, xunto con Ezra Moreno, a compañía El Retrete de Dorian Gray. Nela, experimentou no teatro de obxectos e percorreu máis de 20 países nas pasadas dúas décadas. Esta compañía supuxo o seu proxecto principal ate o de agora.
De volta en Galicia, nos últimos anos centrouse na dirección escénica, especialmente no ámbito do circo, e en propostas de forte carga sensorial e poética como Os Andares, unha serie de paseos sonoros que converten o territorio nun monicreque, un obxecto poético atravesado pola memoria e a emoción. Este proxecto, producido por Fósforo Arte & Cultura, desenvólvese no seo do Colectivo Galiza Emocional, no que tamén traballa na xestión e desenvolvemento creativo.
Ao longo da súa carreira colaborou con compañías e artistas como Chévere, Pistacatro, Producións Teatrais Excéntricas ou Marta Alonso Tejada. A súa obra caracterízase por unha vontade clara de romper co teatro tradicional e explorar novas formas de relación entre escena, espazo e público. Ás veces, conségueo.
Podes coñecer máis sobre o seu traballo en: marcosptt.com
Más info
